Abstract—- নট সংকীর্তন মণিপুরীশিংগী পূন্সিরোলদা থাদোক্নবা য়াদ্রবা মহাযজ্ঞগী শক্তম ওইরবা থৌরম অমনি। অদুবু হৌজিক উরিবা শক্তম অসিমক্তি মতম অমদা নত্রগা তাংকক অমদগী হৌরকখিবা নত্তে। মীরোল কয়া, নিংথৌরেল কয়ানা মথং মথং হাপকৎলক্তুনা তপ্না তপ্না চাউখৎলকখিবনি। মণিপুরীশিংগী পোকপদগী শিবা ফাওবগী পুন্সি খোঙচৎতা নট সংকীর্তনগা তৎন থানবা য়াদবা মরী অমা লৈনরী। মসিনা ঈশ্বরগী খূয়া য়ৌনবগী লম্বী অমনি হায়না লৌনৈ। ভাগ্যচন্দ্র মহারাজগী মতমদা মপুং মরৈ ফারকখিবা মণিপুরী নট সংকীর্তন অসি মহারাজ চন্দ্রকির্তি সনা হাক্তক্তদি হেন্না নীংথিজবগা লোয়ননা অনৌবা কয়া অমসু হাপকৎলক্তুনা খম থেংনা চাউখৎপগী তাংকক য়ৌরকখি। ঈশ্বর ভক্তি হায়বসিনা হিন্দু শাস্ত্রদা খ্বাইদগী মরু ওই। ঈশ্বর ভক্তি হায়বসিগী মনুংদা সংকীর্তন হায়বসিনা অমুক্কা হেন্না মরু ওইবা হেল্লী। মসিমক্না মণিপুরীশিংগী পুন্সিরোলদা সংকীর্তন অসি তৎন থানবা য়াদবগা লোয়ননা অচৌবা মফম অমা কল্লিবনি। ঙসিদি মণিপুরী নট সংকীর্তন ভারত্তদা নত্তনা মালেমগী মফম কয়াদা শকখঙবীরে অমসুং মসিগী চপ চাবা ফীদা অমা ফংলে।